رباعيات مسيحية

تقول يهوذا يكتبوا عن الخيانة ديوان
بزيف الوش وبالغش يتحكموا بسلطان
وتوب البر اللي لبسينوه مالوش معنى
ده كم من يهوذا في ضمايرهم لكن ما يبان


اصنع فلكك يا نوح قبل الطوفان ما يجينا
وصحي الروح اللي ماتت واتكفنت فينا
وقتك كان فيه طوفان ومن بعده حياة
واليوم لوجه طوفان أكيد هيفنينا


ياللي انت تحت الحمول وبينحني ظهرك
ارفع عينيك لفوق في رب منتظرك
تلقي عليه الأحمال والهم ويا الضيق
ده هو وحده اللي يقدر يشيل الحمول عنك

باتوا بين ألف سور والسور ما يحميكوا
وعدوا من الجيش ألوف وسلاح يقويكم
لكن إحنا ويا البوق هنلف سبع مرات
من غير سيوف ودروع هتافتنا تفنيكوا